Mat(b)logg

Tunfiskpita

2008-12-04T11:08:00.003+01:00

Her om dagen kjøpte vi eit par boksar tunfisk, sånn på impuls. Då vi kom heimatt undra vi på kva ein kan lage av slikt. Det vi kom fram til var ein liten parafrase av noko vi smakte på Bare Jazz på grensen i Oslo.

In gredi ensar

- Pitabrød
- Ein eller to boksar tunfisk
- Ein avocado
- Soltørka tomat
- Ein liten dæsj sitronsaft
- Cherrytomat, salat og eventuelt andre salat-ting

Mos avocado og bland med tunfisk, små bitar av soltørka tomat, og sitron. Smør dette inni eine sida av eit oppvarma pitabrød, og trykk inn salatblandinga. Tada.

Og vips - ein framifrå middag. Eller lønsj.

Andreasmiddag - no med bilete!

2008-05-29T20:03:00.005+02:00

Quiche med kylling

Paideig

Dobbelt så mykje mjøl som smør. 150 gram smør til 28 cm lav form, til dømes. Og litt salt (etter smak). To eller tre ss vatn, så deigen festar seg til seg sjølv.

Fyll

- Kyllingfilet i høveleg store bitar
- Squash 1/2
- Aubergine 1/2
- Ein løk
- Sopp
- Tomat, utan innmat. Det blir så mykje vatn.
- 4 egg
- Melk
- Litt fløyte
- Kvitlauk etter smak. Vi nytta tre fedd.
- Raspa ost
- Salt og pepar
- Fersk basilikum

I kjøkenmaskin eller foodprofessor, køyrer du mjøl og smør til det smuldrar opp. Tilsett vatn så du får ei fast deig. Hvis du ikkje har ei fancy schmancy maskin, så del smøret opp i mindre bitar. Pass på at det er mjukt (ta det ut av kjøleskapet ein liten time i forkant, feks). Så må du elte det godt.

Steik kyllingfileten i tørka basilikum, salt og pepar og litt olje. Sett til side når dette har fått fin steikeskorpe. Fres lauken og hiv oppi resten av grønsakene etterpå og rør medan det steikast.

Paideigen trykkast ut i forma og forsteik til den er fast og fin i "fisken." Den må ikkje vere for tynn, sidan den kjem til å krympe. Heller ikkje for mange skøytar og lappar.

Bland egg, melk, fløte og ost saman med krydder. Fyll den forstekte paien med kjøtt og grønsaker og hell eggblandinga over heile sulamitten. Pass på at det blir litt avstand opp til kanten, ellers kan det bli flom.

Quichen må stå i ca en halv time eller til den er gylden oppå, på ca 150 - 175 grader. Pynt den med blad av frisk basilikum.

Pannekaker à la oldefar.

2008-05-22T22:02:00.001+02:00

4 egg
4 ss sukker
2 ts vaniljesukker
1 l mjølk
mjøl til passe tjukk røre. (Om lag som krema blomkålsuppe)
litt salt (ca 1/2 ts)

Rør saman egg og sukker.
Ha i vaniljesukker og mjølk.
Rør inn mjøl.

Om du et røra stå 15-30 min vil evt klumpar ha løyst seg opp og røra bli litt tjukkare, men du kan godt steike pannekakene med ein gong.

Ha ein dæsj margarin i panna før du steiker så dei ikkje set seg fast.

Om du vil ha bacon til kan du steike det først og røre inn fettet som blir att i steikepanna i røra, men fett er ellers ikkje naudsynt.

4 egg pr 1 liter mjølk. Husk det. Om du vil ha mindre røre lagar du berre mindre i ca forhold til kvarandre. Det er ein fordel om egga er litt store. Røra blir betre då. (Eg plar forresten berre å tøme rett frå posen/e.l opp i røra. Å vere pinleg nøyaktig er vekkasta tid. Alle mål er ca, men ikkje overdriv... :p)

Wok med laks og shit.

2008-03-02T16:01:00.003+01:00

Eit stykke passe stor laksebit
Green stuff

Marinade
Ingefær En del
Kvitlauk Passe
Chilipasta Passe
Soyasaus En god dæsj
Østerssaus En minst like god dæsj
Nøytral olje Litt
Limeskal Av ein heil lime

Mariner fisken ein time eller to. Steik den og legg den over på eit fat. Wok grønsaker etter eige ynskje. Når dei er høveleg ferdige har du over resten av marinaden, kanskje litt sesamfrø og legg fisken på toppen så den får varme seg litt att.
Server når du meiner det er på tide.
Det er ikkje spesielt dumt å ha ris til.

Nammenammenamm!

2007-12-03T12:57:00.000+01:00

Sundagsmiddag.
Fisk.

Når restemiddag er kjempegodt, er det stor sjanse for at middagen òg var god. Eller som Andreas så fint seier : "Når restemiddag i det heile tatt blir spist."
Så, her er oppskrifta på fisk med late-som-indisk-saus og ris.

Høveleg mengde fisk
3 fedd kvitlauk
Ein halv lauk
3 toppa teskjeier garam masala
1 toppa teskjei paprikapulver
1 lita teskjei kardemomme
1 lita teskjei sambal oelek
1 teskjei curry-pasta
Salt
Litt pepar
Ein boks kokosmjølk
Brokoli etter ynskje.

Hakk kvitlauk og lauk. Bland saman med krydder og kokosmjølk. Smak til med salt og pepar.

Nytt ei ildfast form. Om du legg i fisken først blir den kokt i sausen. Om du legg brokoli under fisken vert den dampa.
Dekk forma med aluminiumsfolie og set det heile i omnen på ca 170-200 grader, til fisken er ferdig.

Kok ris i buljongvatn. I går vart det nytta grønsaksbuljong.

Sjølvsagt kan du ha fleir 0g/eller andre grønsaker i. Vi hadde squash i kjøleskapet, og dermed vart den nytta.

Reven gulrot til kan òg anbefalast.

Til dessert:
Tropisk frukt i sukkerlake med is.

By default vart det ei halv appelsin, ein banan og ein mango.
Skjerast i høveleg store bitar. Kok opp ca 1,5 dl vatn med like mykje sukker og litt honning (2ts). Ha i frukta så den blir varm. Server så raskt som råd.

Middag medan Liv Marie var på vitjing.

2007-10-03T20:36:00.000+02:00

Eg er for å omnsbake middag. Det er i det heile særs praktisk og lagar seg om lag heilt av seg sjølv.
Laks er fint. Og det er godt med tomatsaus.

Fire laksestykker
Eg nytta findus sin med sitronpeparmarinade. Eg veit ikkje om eg kjem til å nytte den fleire gongar.

Grønsaker av eget val i høveleg store bitar. (T.d. purrelauk, minimais, gulrot, brokoli, osb.)

Tomatsaus
Ein halv boks godt mosa tomat med kvitlauk
Ei lita skei Sambal Oelek
Salt
Nokre soltørka tomatar i bitar
Ein dæsj av oljen som dei soltørka tomatane låg i.

Om ynskjeleg litt reker.

Aluminiumsfolie -> Omn - varm -> Til det er ferdig.

Pasta er fint til.

Kva Ragnhild et åt til middag.

2007-10-03T20:22:00.000+02:00

I dag har eg hatt Ragnhild på vitjing. Andreas var ikkje heime. Synd for han, for det var god middag.

Omnsbaka kylling med pesto.

3 kyllingfiletar
1/2 purre
2 gulrøter
Ein liten chili
Litt paprika
Litt soltørka tomat.

Skjær grønsakene i høvelege bitar og legg dei på eit stykke aluminiumsfolie. Dette må vere så stort at du kan pakke inn maten. Legg kyllingfiletane på toppen av det heile. Smør det inn med pesto.
Eg brukte pesto frå glas som eg blanda ut med olivenolje og minced garlic, most kvitlauk på glas.

Steik det heile i omnen på varmt til det er ferdig.

Ved nærare ettertanke er det sikkert bra med brokoli og eit lite dryss parmesan på toppen. Og kanskje litt salt og pepar. Men det får bli ein annan gong.

Eg laga litt meir mat enn vi strengt talt trengte, litt fordi tre samanfryste kyllingfiletar er vanskelege å få frå kvarandre før dei har tina og litt fordi Andreas spurde fint om han kunne få smake når han kom heim. Så no står der ein boks med restar i kjøleskåpet.

Fiskegryte á la Perdy.

2007-10-01T17:58:00.000+02:00

Ex.Phil-oppgåve ferdig, hurra! Mat, hurra! Fiskegryte?

Perdy var gift med Konrad Bernhard til han døydde. Eg mistenker at han ikkje leid i matvegen all den tid dei var gift. Bernhard freista alltid å late som han kunne stikke av med nasen min kvar gong vi møttest, men eg trur den sit godt fast enda.

Eigentleg er det meir ein fiskewok, men wok er noko nymoderende noko og det er farleg. Fiskegryte derimot har vi høyrt om før.

Grønsaker er eigentleg etter smak og sesong. (Eller kva som er i kjøleskåpet.) Er det godt, kan det sikkert nyttast.
Gjer alt klart før du byrjar å steike.

Fisk av eit (eller fleire) slag. Eg nytta laks, men sei har vore nytta før med stort hell.

Hovudkål
Gulrot
Purrelauk
Minimais
Brokoli

Kvitlauk
Chili
Limeskal

Ein boks Creme Fresh

Karri
Basilikum
Solsikkeolje

Ha olje i woken/panna, og lat det bli varmt. Fres karri, basilikum, chili, kvitlauk og limeskal. Ha så i grønsakene, start med dei som treng lengst tid som t.d. gulrøter og kål.
Når dei er passe møre har du i creme fresh og kanskje litt vatn, etter kva konsistens du vil ha på sausen. Legg fisken på toppen utan å røre, den skal berre dampe. Maten er ferdig når fisken er det.

Ris koka saman med ein god dæsj karri er godt til.

Hurra! Steikepanne!

2007-09-15T16:10:00.000+02:00

Indisk-isj sop-i-hop.

To kyllingfiletar skorne i bitar

Marinade:

Ei god dæsj soyasaus
Ein betre dæsj olje
Riven, fersk ingefær
Ein chili i småbitar
To fedd kvitlauk
Ei skei currypasta
Kardemomme
Garam Masala-kryddermiks
Pepar
Salt
Smak deg fram til du finn ei blanding som kjennast rett ut.
La kyllingen ligge i marinaden til du er lei og vil ha middag.

Steik bitane i steikepanne. Hell over den overflødige marinaden. Tilsett ein liten boks kokkosmjølk og lat det koke inn. Hell over ein boks ananas med all jusen (pass deg, den bit visst når den er i jusen) , og lat det koke vidare.

Server med ris og nanbrød.

Vårrullar

2007-09-10T16:19:00.000+02:00

Her eine dagen då vi var på biltur slo det oss at vi skulle freiste å finne asiamat-butikken vi har kjøyrd forbi skiltet til opptil fleire gongar. Heilt lett skulle det derimot ikkje vise seg å vere, og vi var nøydde til å ta ein ekstra sving innom E6 før vi fann rette avkjøyrsla. Men der låg den altså. I eit lite lokale i ein stor lagerbygnad, med mest muleg hylleplass pr kvadratmeter. Og der fekk vi den gode idéen om å freiste å lage vårrullar.
Eg veit ikkje om der er nokon teori bak den perfekte vårrull, så eg satsar på at det viktigaste er at den smakar godt. Fyllet vart eit resultat av kva dei hadde på den lokale Bunnprisbutikken, eller snarare kva dei ikkje hadde. Eg kunne til dømes godt tenkt meg å hatt bønnespirar i.

ca 25 vårrullar

tre kyllingfilétar
ein lauk
ein halv purrelauk
to gulrøter
ein chili
tre fedd kvitlauk (eller var det fire?)

Skorne i bitar høvelege for å bli rulla i deigflak. Steik. Eg har framleis berre to panner, den største rommar 3 liter, så eg tok det i fleire omgangar før eg tilslutt rørte det heile i hop saman med ei blanding av

soyasaus
kvitlaukspasta
sambal oelek (chilipasta)
ingefær
paprikapulver
pepar
salt
olje

Så var det berre å legge høvelege mengder fyll på kvart flak, rulle saman og lime med eit samanpiska egg. For instruks på dette feltet, nytt google eller andre eksterne kjelder.

Frityrsteik i nøytral olje.
Smakar godt saman med søt chilisaus og ris.

Kritikk har kome grunna for mykje kjøt i hushaldninga sitt kosthald, men i denne oppskrifta kan du nytte kva som helst (?) til fyll, altså; du kan velje å ikkje ha kjøt i.

Middag utan lauk.

2007-09-09T22:34:00.002+02:00

Krise? Neida. Sundagsmiddagen denne gongen vart omnsbakt seifilét med rømmesaus.

Tre poteter skorne i skiver
To gulrøter skorne i stavar
Ein pakke brokoli
Ein seifilét

Ein halv pakke rømme
Sitronpepar
Basilikum
Fire/fem skiver sylta agurk i små bitar
Matojle
Rør saman

Dander det heile fint på aluminiumsfolie, inn i ovnen som er forholdsvis varm. La stå til det er ferdig.

Tid for meir suppe.

2007-09-09T22:34:00.001+02:00

Her tidlegare i haust kom Andreas heim med ei orange kokebok. I den står mellom anna oppskrift på potetsupe, som bestemor ville ha sagt. Billeg, og overraskande god. Eg laga så mykje at eg trudde vi kunne ha til ein middag til, men det gjekk ikkje av di Andreas gjekk å åt av den medan den kolna. Så no er det berre ein porsjon suppe i frysaren, ikkje to.
Eg trur det tydar på at suppa var god.

Potetsuppe (ca 4 porsjonar.)

Bacon ca 100g. (Eller kanskje litt meir ...)
Ein lauk
Ein purrelauk
Fire store poteter
To gulrøter
1 1/2 liter kjøtbuljong (Det stod kjøtkraft i boka, men det har eg ikkje laga)
Eit laubærblad
Salt
Pepar

Skjer alt opp i høvelege suppebitar. Det kan vere ein fordel at grønsakene er vaska og/eller skrella. Fres lauk og bacon i ei høveleg stor panne (eller kaserolle som nokon ville sagt). Tilsett grønsakene i små porsjonar så dei og får fres på seg. Tøm så i buljongen, putt i krydder og la det småkoke med lokk på i om lag ein halv time.
Så mosar du suppa litt, smakar om det er lagom med krydder og serverar med godt samvit.

Eg gløymde å ha i muskatnøtt (pitt pott nøtt skulle ut å gå ....), men eg trur ikkje nokon tok noko særleg skade av det. Merian hadde eg heller ikkje i (kva no enn det er for slags krydder) a di eg ikkje hadde det tilgjengeleg. Men det vart då etande likavel.

Tomatsupe

2007-09-09T17:25:00.000+02:00

Nei, ikkje sånn ekkel toro-glye frå pose. Eg laga den om lag frå botnen av. ICA hadde vore så snille å hakka opp tomatar, og toro har koka i hop buljong. Men ellers var det all me.

Tomatsupe

Ein og litt til pakke med grovhakka tomat (ca. 700-800 g)
Ein liter kjøttbuljong
Ein og ein halv lauk
Kvitlauk
Salt
Pepar
Litt basilikum

Fres lauken
Ha i tomat og buljong. Smak til med salt og pepar
Nyt.

Sjukehuset

2007-09-05T22:44:00.000+02:00

Eg er sjuk. Andreas er og sjuk. Men eg mest.
Eg har budd under dyna mi på sofaen i heile dag, og har etter sigande snorka. Difor vart det Andreas si oppgåve å dikte middag i dag; frosenpizza som nok var det greiaste med tanke på basiluskar og det som verre er i maten.

Så spanande var matvegen i dag. Det burde eigentleg vore lovfesta at ein skal sleppe å ete kjip mat i tillegg til å vere sjuk. Men det skal seiast, det var ikkje den verste frosenpizzaen eg har ete i mitt liv. Eg minnast nokre test-greier frå den gongen pappa jobba i Stabburet og vi var forsøkskaniner. Snasent.

For mykje mat.

2007-09-04T17:46:00.000+02:00

Det skulle eigentleg vere enkelt. Er ein sjuk plar ein å få fritt val på øvste hylle når det gjeld kva ein vil ha til middag. (Dette gjeld og mykje anna, til dømes sjokolade.) Sjuklingen ville i dag ha "hammbgær" (eg er fire år, sjuk og snøvlar), noko eg tolka til å vere hamburger. Eg har framleis ikkje steikepanne sidan flyttelasset med steikepannene i ikkje kjem før neste helg, altså ikkje den komande.

Men ja, maten. Det plar vere litt keisamt å berre ete most kjøt mellom to brødskalkar, tykkjer eg, så eg er for ekstra ved sida av. I dag vart det poteter i båtar omnsbakte med salt, pepar og rosmarin. Og litt olje, sidan det har det med å vere lurt.

Det er meir praktisk med ei steikepanne enn ingen. Kaseroller er ikkje laga for å steike hamburgarar i.

Og folk som er sjuke et mindre enn dei som ikkje er det.
Ikkje at det spelar stor rolle i denne husstanden. Sidan vi båe i dag er sjuk, svak, dårleg bak og ikkje heilt bra sjølv heller.

Kylling

2007-09-03T19:02:00.000+02:00

Eigentleg skulle vi ha sei til middag i dag. Men den var for seint ute (frosen), så vi tok den liksomferske kyllingen i staden. Det eg dikta var om lag slik:

Den halve purren som var til overs frå ein dag før
Ein halv paprika (eg likar best den oransje)
Ein stor sjampinjong som snart sang på siste verset
Nokre soltørka tomatar, av den typen som ligg i olje

Vart skore i høvelege bitar, og lagt på aluminiumsfolie i ei steikeplate. Dryss over litt salt og pepar. Legg kyllingfiletane på toppen av det heile.

Ynskjelege mengder kvitlauk hakkast opp
Bland med høvelege mengder olje frå dei soltørka tomatane.
Ein dæsj oregano
Salt
Pepar
Litt "krossade tomatar"
Basilikum om hugen er der.
Ei lita skei med tomatpuré

Smørja grisar du over kyllingane.

Eg hadde blomkål og brokkoli, den frosne latmannstypen, saman med kylling og resten av grønsakene før eg bretta att aluminiumsfolien som ein dårleg pakke.

Steikas i varm omn til det er ferdig.

(Tips 1: Nytt den tjukke typen folie. Mindre sjanse for rifter og lekasje.)
(Tips 2: Ris fungerar som tilbehør, men eg trur pasta er betre.)

Kjøttkaker i brun sos.

2007-09-03T07:40:00.000+02:00

Å lage kjøttkaker når alt ein har å hjelpe seg med av kaseroller er ei lita ei og ei som er enda mindre går betre enn ein kanskje skulle tru. Det var i alle høve ingen utprega dritsmak på middagen. Prosessen var om lag slik:

Hugs å tine kjøttdeiga så den ikkje er frosa når du har planlagd å byrje. Overaskingar kan kome, til dømes folk som kjem heim en time før dei eigentleg hadde sagt.

Middag til 3

Ein og ein halv pakke kjøtdeig.
Ein lauk
Kvitlauk etter eige ynskje.
Salt
Pepar
Muskat
Ingefær
Ei lita skei curry-pasta (kan sjølvsagt sløyfast. Vart eigentleg med grunna kokken si nyfikne innstilling.)
Ein dæsj olje. (Eg nytta oliven, av di det var det eg hadde.)
Ein dæsj mjølk.
(I etterpåklokskap ser eg at potetmjøl sikkert ikkje hadde vore ein ulur idè for å få litt meir samanbundne kaker.)

Rørast i hop til ei passe smørje. Smak til med krydder. Form passe store kaker med ei skei, eller nevane. Det kan vere ein fordel å trykke dei litt flate, då blir dei steikt forare. Steik gjerne i melange.

Når du er ferdig å steike kakene smeltar du meir margarin i panna (1-2 ss). For at sausen skal bli brun, lyt smøret vere det. Når du er nøgd, eller evt ikkje gidd meir, rører du inn eit par spiseskeier mjøl, let det og brune før du sper med vatn eller anna veske. Smak til med krydder etter ynskje, salt/pepar, kanskje ein buljongterning (helst ikkje fiskebuljong). Kok opp, hiv i kjøttkakene og lat dei godgjere seg.

Du bør óg finne tid til å koke poteter. Eg hadde slave på kjøkenet medan eg laga denne middagen, noko som synte seg særs praktisk.

Etter at potetene var om lag ferdige (eg er ei utolmodig sjel) nytta eg det allereie varme vatnet til å dampe brokoli.

For virkeleg å understreke at dette var ein sundagsmiddag, vart det brownies og is til kaffien.
Kake tykkjer eg høver fint i fortsettinga av vellukka kjøtkaker.